Tej menyuam yaus lawv muaj txoj kev ntshai uas yeej yog ntshai tiag tiag xws li ntshai tsaus ntuj, ntshai kab, ntshai tej tsiaj loj loj uas lawv cim civ xav… tiamsis tsis yog tej menyuam lawv thiaj muaj txoj kev ntshai no xwb, neeg laus los kuj muaj ntau yam ua rau peb lub siab tsis kaj siab xws li: kev puas tshuaj, nyob ib leeg, txhawj, lossis lub neej tom ntej tsis paub yuav ua li cas. Tiamsis thaum ib tug menyuam lawv nug. “Yam uas txaus ntshai ntawd yuav ua dabtsi thaum lawv ntsib Vajtswv?” tej zaug peb kuj yuav tau nug peb tus kheej txog qhov ntawd. Lo lus teb tsis yog nyob hauv tej menyuam lub siab xwb, tiamsis tseem ua rau muaj kev kaj siab tob tob tseg rau peb, yog cov neeg uas tab tom taug kev hauv lub ntiajteb muaj puv npo kev hloov pauv no.

Hnub no, yog hnub 05/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Mary Holloman dhau ntawm Zaj kawm KOJ PUAS MUAJ YAM UA RAU KOJ NTSHAI?

Vajluskub: “Tus uas muaj kev hlub lawm tsis tas nws yuav ntshai, rau qhov txojkev hlub uas zoo kawg nkaus yuav tshem tau txojkev ntshai tawm” (I Yauhas 4:18a).

“niam kuv ntshai kab zaug!” kuv tus tub muaj 4 xyoos nws hais li ntawd, nws ob lub qhov yeej saib ntsoov qhov khoom ua si ntawm tes. Nws lub suab yeej hnov cuag li hais yuam kev rau yam ntawd.

Kuv yeej tsis muaj dabtsi yuav xav tsis thoob. Tau ib lub sijhawm ntev, nws ua npau suav ntshai heev txog tej kab zaug, hom kev ntshai uas niaj hnub nim no ntau zaug tej neeg laus los kuj tiv tsis tshua taus.

“Tsis ua cas os, metub!” kuv teb, “Niam kuj pom tias kab zaug kuj txaus ntshai heev. Leej twg los twb muaj ib yam dabtsi twg ntawd ua rau yus ntshai. Tshwj qee tus neeg xwb. Tiamsis muaj ib tug neeg uas yeej tsis ntshai dabtsi li, koj puas paub tus ntawd yog leej twg?” kuv maj mam nug kuv tus tub.
Kuv tus tub tamsim ntawd luag ntxhi, lo lus nug uas nws nyiam teb tshaj yog: “Yog, tus ntawd yog Vajtswv!”

Tas nws xav. “Yog li…. Thaum tej yam txaus ntshai ntawd ntsib Vajtswv, lawv yuav ua li cas?”

Kuv txiav txiav muag. Lub siab xav twj ywm tias: “Txog thaum twg nws mam nug tej lo lus nug uas yooj yim zog?”

Kuv xav txog ib qhov chaw hu ua “Thaj chaw ntawm txoj kev ntshai sib ntsib”, qhov chaw uas tag nrho txhua yam ua rau tej menyuam yaus ntshai xws li, kab zaug, tej tsiaj txaus ntshai, qhov tsaus ntuj, cua daj cua dub, kab ntsig, tus neeg uas lawv tsis tau ntsib dhau… Tej yam ua rau tej menyuam quaj qw thaum hmo ntuj lossis khiav nkaum vim tsis muaj kev kaj siab. Tas kuv xav txog lub sijhawm uas tej ntawd ntshai ua ib ce tshee nyho, nyo hau ntawm ib tug Vajtswv uas dawbhuv thiab muaj hwjchim.

Kuv hais qhia rau kuv tus tub paub tias txhua yam uas Vajtswv tsim los puav leej yuav tau mloog Vajtswv lus, txawm yog tus kab zaug uas loj tshaj txaus ntshai tshaj los kuj piv tsis tau rau Vajtswv lub hwjchim.

“Thiab yam uas zoo tshaj” kuv hais ntxiv, “yog tias peb paub Vajtswv, Vajluskub hais tias peb tsis tas yuav ntshai Vajtswv. Vim Vajtswv tuaj peb tog, Vajtswv tiv thaiv peb thiab ua rog hloov peb chaw”.

Kuv tus tub mloog kuv hais ib pliag tas, nws kuj ncaws ncaws hau: “Oh… zoo tshaj!” Tas kuv tus tub nws zoo siab rov qab mus ua si nrog nws tej khoom ua si.

Tiamsis tshuav kuv ces xav txog lo lus nug ntawd tsis tseg:
“Tiamsis tej yam txaus ntshai ntawd yuav ua li cas thaum ntsib Vajtswv?”

Tas kuv rov qab xam txog “lub rooj sib ntsib ntawm tej kev ntshai”. Kab zaug thiab nab chev ua ib kauj nkaum hauv tej qhov tsaus ntuj. Tej tsiaj phem tab tom zaum rau hauv qhov tsaus ntuj, nyooj laws hem tus ub tus no. Fuab dub kiv loj kiv lees tab tom qhia rau paub txog tab tom muaj ib nthwv cua tab tom los ze, tshuav tus neeg tsis paub saib los ntawm lub qhov muag tsis ntseeg siab.

Tas kuv cim civ nug, yam dabtsi ua rau kuv ntshai?

Lub caijnyoog ntawd rov qab tshwm ib zaug ntawm kuv lub qhov muag. Zaum no tsis pom kab zaug thiab nab lawm, pauv rau qhov ntawd yog ntshai tsam kuv poob kuv tus menyuam. Qhov chaw uas tej tsiaj heev nkaum, thaum no yog txhawj txog lub neej tom ntej tsis paub yuav zoo li, qhov chaw cua daj cua dub tab tom ntsawj los txog, thaum no yog nthwv fuab tsaus nti ntawm txoj kev nyob ib leeg tsis xav ntsib leej twg, ib yam li muab tej fuab cua thiab qhov kaj zuaj ruaj ruaj ntawm tes hauv kuv lub siab.

“Yam uas ua rau muaj kev ntshai yuav ua li cas thaum peb ntsib Vajtswv?”

Lo lus teb pub rau kuv tus tub puas txaus rau kuv tus kheej tamsim no?

Paulus hais nyob hauv Loos tshooj 8 tas hais ntxiv tias:

“Peb tseem yuav hais li cas thiab? Yog Vajtswv tuaj peb tog lawm, leejtwg tseem yuav tawmtsam tau peb? Tsis muaj ib yam dabtsi yuav cais tau peb tawm ntawm Yexus Khetos txojkev hlub, tsis hais teebmeem, kev nyuaj siab, kev tsimtxom, kev tshaib kev nqhis, kev txomnyem, kev txhawj ntshai, lossis kev ploj kev tuag…Rau qhov kuv paub tseeb hais tias tsis muaj ib yam dabtsi yuav cais tau peb ntawm Vajtswv txojkev hlub, tsis hais tuag lossis kev ua neej nyob, cov timtswv lossis cov uas muaj hwjchim kav saum nruab ntug, nimno lossis yav tom ntej, saum nruab ntug lossis hauv nruab tivtxwv, lossis ib puas tsav yam uas yog Vajtswv tsim yeej tsis muaj ib yam dabtsi cais tau peb ntawm Vajtswv txojkev hlub uas nws pub Yexus Khetos uas yog peb tus Tswv los tuag theej peb lub txhoj (Loos 8:31-39).

Ib leeg nyias yeej muaj nyias ib yam dabtsi ua rau yus ntshai. Tiamsis yog kuv nyob hauv Yexus Khetos, tej kev ntshai ntawd kuj tsis muaj hwjchim kav kuv lub neej lawm. vim kuv lub neej thiab kuv tus ntsujplig twb tau nias cim los ntawm Tswv Yexus cov ntshav. Tsis poob dabtsi, tsis txhawj, tsis nyob ib leeg, tsis muaj txoj kev tsis xav ntsib leej twg lawm, thiab yeej tsis muaj ib tug “kab zaug” twg muaj cuab kav cais tau kuv tawm ntawm Vajtswv txoj kev hlub.

“Yam uas ua rau muaj kev ntshai yuav ua li cas thaum peb ntsib Vajtswv?”

Lawv yuav txhos caug ntawm kuv Leej Txiv saum ntuj lub xub ntiag.

Thiab zoo ib yam li ib tug tub muaj plaub xyoo tau qw nrov nrov: “Qhov ntawd zoo kawg nkaus li!”

Thov caw nrog kuv peb thov Vajtswv ua ke
Tus Tswv uas muaj kev hlub, kuv ua Koj tsaug vim Koj nyob ntawm kuv ib sab. Kuv ua Koj tsaug vim tsis muaj ib yam dabtsi yuav cais tau kuv tawm ntawm koj txoj kev hlub. Thaum no, kuv thov koj tshem tej kev txhawj thiab ntshai tawm hauv kuv lub siab mus. tus Tswv, thov pub rau kuv kom muaj kev kaj siab thiab kev zoo siab vim paub tias koj nyob ntawm kuv ib sab. Yog kuv nyob hauv koj, kuv paub tias kuv tsis muaj dabtsi yuav ntshai, vim txhua yam puav leej nyob hauv koj txhais tes tswj. Kuv ua Vajtswv tsaug vim Koj txoj kev hlub tshwm ntsej muag nrog kuv nyob! Kuv thov hauv Tswv Yexus Khetos lub npe. Amees.

Cov kwv tij txhua tus, koj sim xav txog “lub rooj sib ntsib” ntawm txhua txoj kev ntshai lossis kev txhawj lub sij hawm no. twb txog lub sijhawm peb yuav tau hu npe thiab tej ntawd yuav raug ntiab tawm hauv peb lub siab mus. Hnub no, thaum txoj kev ntshai nrhiav kev nkag los rau hauv koj lub siab, nco ntsoov tias tej yam uas txaus ntshai ntawd yuav tau nyo hau ntawm tus tsim ib puas tsav yam. Koj yog Vajtswv tug, tau tiv thaiv hauv Vajtswv txoj kev hlub. Cia li ua lub neej nrog txoj kev ntseeg muaj zog, ntseeg tias yuav tsis muaj ib yam dabtsi, txawm yog tej kev ntshai ntawd yuav cais peb tawm ntawm Vajtswv. Yog peb tab tom qhia tej menyuam yaus lossis muaj tej menyuam mos nyob ib ncig peb, yuav tau pab kom lawv nkag siab tias: Vajtswv yog tus muaj hwjchim thiab yuav sawv rau ntawm peb sab, Vajtswv yog tus yuav pab kom peb kov yeej txoj kev ntshai.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.